Ich ha nie die glich Situation gha. Wenn ich wütend bin spiel ich Schlagzeug oder Singe es Hard Lied woni gad guet kenne oder lose eifach Musik. Sport hilft mengmol au.

Mach öppis wo gern machsch. Ich bi halt sehr emotional und weiss bi gwüssne Songs genau was für en Stress ich mol erlebt han und das ich es duregstande han im Nachhinein de.

Merci vielmoll☺️

Hei,

Ich weiss ned ob dir das wiiterhilft, aber i chan verstoh, dass schwierig isch drüber zrede. Aber ich finds echt muetig und gut vo dir, dass du e Lösig suechsch, demit umzgo. Ich chan (leider) ned nohfühle, wie du dich i sonere Situation vome Wuetaafall fühlsch, aber das schlechte Gewüsse und dVerzwiflig, kenn ich au. S'Gfühl vo "wieder moll han ichs verkakt", "ich bin so scheisse", "warum bin ich so?", etc. schwebed gern im Körper ume und me zieht sich gern no tüfer in es Loch, wills sich doch irgendwie "guet" (ned guet, aber es git eim e gwüssi Befriedigung, will me sich selber Bestroft) aafühlt. Und wenn me denn i dem Loch isch, sinds denn plötzlich so viel Gfühl, dass alles use mues. Me chans ned kontrolliere und me isch hässig und wüetend. Was dezue führt, dass me sich nochher wieder schlecht fühlt und wieder in es Loch gheit und alles wieder vo vorne los got = en Tüfelskreis. Ich selber han frühner au Phasene vo Wuetafall gha, wo ich selber nümm ich gsi bin und nochher ned ganz druss cho bin, warum und wiso. Ich han mich dem Problem selber gwidmet und probiert dä Tüfelskreis durchzbreche. Will ich aber gwüssi Sache, oder ebe gnau diä Sache wo das uusglöst hend, verdrängt han und nöd han welle verarbeite, han ichs allei ned gschafft.

Ich bin per Zuefall an Öppert (professionells) grote, wo ich mich sehr wohl gfühlt han und ich mich noch einige Mool, han chöne öffne. Sie het di richtige Froge gstellt, het zueloset und het au Kommentär dezue gmacht, wo mir wiitergulfe hend, mich mine Gfühl aazneh. Es isch schwirig gsi z'uusdrücke, was mir ned guet tuet und ich han unter Träne und mit chli Angst (das ich mich schämme mues), denn endlich dä Grund chöne sege wo mich tüüf im Innere scho lang bedrückt het. Es isch extrem befreidend gsi. (Han mich gfühlt als würd i schwebe.) Vor dene Treffe und em Rede mit ihre, han ich ned gwüsst, dass ich dä Grund eigentlich diä ganz Ziit kennt han, aber ned ERkennt han. (Falls das Sinn ergit.)

Denoch han ich au no es paar heikli Situatione gha, aber ich han mit mir chöne selber "rede" und mich wieder chöne beruhige.

Aso, ich weiss, es schwirig über sich zrede. Me het Angst bewertet oder verurteilt zwerde und denn fühlt me sich evtl. au chli wie iigengt. Aber wenn du es guets Buchgfühl hesch, dass du dere Person chasch vertraue, denn probier dich zöffne. Es lohnt sich absolut!

Grüessli, Nati

Hallo Wärauimmer,

es isch mir sehr, sehr lang wie dir gangä. Ich cha dir nur vo mine eigene Erfahrige verzelle, öb das bi dir so isch, das muesch sälber usefinde und beurteile, aber villicht isch es en Versuech wert.

Inzwüsche han ich en Grund defür usegfunde, dass ich mich so verhalte wie ich's tue: Ich han ADHS. Bi mir zeigt sich das dur e ENORMI Energie, ich han immer vill gliichzitig am Laufe, Multitasking isch en Normalzuestand. Konzentrier ich mich aber mal uf ei einzigi Sach, wird's extrem energieglade (sog. "Impulsivität" bi ADHSler). Bspw. au im Umgang mit minere Familie. Und das, obwohl ich en extrem friedliebende, hilfsbereite und sehr empathische Mänsch bin. Ich chan eifach nüt degäge tue, es passiert eifach. Und am Schluss suech ich de Fehler immer bi mir und fühl mich schlächt und schuldig. (Stichwort: grings Sälbstwertgfühl)

ADHS-Lüüt händ oftmals es gringers Sälbstwertgfühl, will sie merked, dass sie andersch sind als anderi, und sie fühled sich dadurch unbewusst echli usgschlossä, was natürli au zu impulsive Reaktione füehrt.

A dinere Stell würd ich mich uf ADHS bzw. ADS teschte laa, das chasch sicher det ufgleisä, wo du scho in Behandlug bisch. Es cha dir villicht hälfä, z'verstah, wie du funktioniersch. Es heisst nöd, dass du dänn zwingend Ritalin näh muesch. (Bi mir hät Ritalin nur d'Impulsivität verstärkt und ich ha fürchterlich g'littä, drum han ich's bald wieder abgsetzt.)

Wie ich besser mit dere Impulsivität, wo ja doch rächt aasträngend isch, zrächt chume, han i inzwüsche au usegfunde: Mit echli Usduursport, am beschtä täglich am Morge, gaht's mir vill besser, dänn das isch öppis, wo wie mini überschüssig Energie "ablaht" und min Energielevel usgliicht und mich stabilisiert. Und - wenigschtens bi mir isch es so - die überschüssig Energie isch ja das, wo sich dänn bi z. B. Familie entladt. Dur e intensivi halbi Stund uf em Crosstrainer oder en Kilometer Schwümmä normalisiert sich mis Läbä und de Umgang mit de Lüt um mich ume. Und das isch so e Erliechterig!

Was au probiere chasch (isch aber nöd so effektiv wie Usduursport), isch, e chli meh druf z'achte, öb du i de 1-2 Täg vor so "Usbrüch" villicht meh Cholehydratbombe wie Teigware oder Cornflakes gässä häsch. (Mini Therapeutin glaubt mir das nöd, aber es isch wahr.) Zwei Täg hinterenand Spaghetti mached mich total agressiv. Leider kein Witz, ich ha gern Teigware 😒. Aber Cholehydrat sind halt für de Körper gschnäll verfüegbari Energie d. h. das isch das, wo dänn ebä au abgruefä werde chan bi so "Usbrüch". (Wieso ich das bi mir beobachtet han, isch, will ich mal e Sändig gseh han, wo mer emne Chind, wo sich wie en Tyrann ufgfüehrt hät, emal weniger Cholehydrat gäh hät und nach enere Wuche isch das gliiche Chind wie usgwächslet gsi: total friedlich und entspannt. Dänn hät mer em nomal zwei, drü Täg meh Cholehydrat gäh und de Tyrann isch wieder da gsi.)

Ich weiss, das alles tönt rächt ungwöhnlich (oder sogar schräg? 🙈), aber ich weiss, wie mer unter so Sache liidet, und schlussändlich isch egal, was eim hilft, solang's eifach nur hilft.

Ich wünsche dir vill Glück und alles Gueti!