Hallö Velö :)

I cha vilech e teil vo mire gschicht teile, vilech bringts der öppis.

Siti 15i bi oder so hani de kollege ufd frog wie gohts immer g'antwortet "müed - und dir?". Wöuis au immr bi gsi. Egau wieviu asi ha gschlofe, i hami nie fit gfüehlt. Ig ha viu vo mine interessene loh lige oder bine nid nochegange und ha immer wie meh i tag glebt. Idr lehr und när idr bruefsmatur cha das no easy si, me het ja gnue umd ohre. ha zwar nie wäuts viu kollege gha aber immer es paar und haut e fründ. Und wenni deno 2h am tag gamed ha oder no meh ade weekend si d täg meh odr wenigr gfüut gsi. D umstäng heisech mit innert paar johr gänderet und plötzlech hani e eigeti wohnig gha, gnue wit wäg vo dahei, homeoffice, zviu zit, zweni kontäkt und zviu schlechti gedanke. I ha denkt ases vilech hiuft, mi lah chrank zschribe zum chli zit für mi zha. Es isch nere fasch angrhaub jahr gsi woni nid gschaffet ha, nume umeglungeret, nume inegraucht. Mi vatter hetmi i dere zit mega ungerstützt im hushalt, glichzitig mitm vorwurf stark asi mi doch astrenge söt und mi ufraffe.. Hetz natürli nid besser gmacht, hauptsach dr hushalt isch am laufe, egau wies ar psyche gaht. Zimli am tüüfpunkt hani würklech nümm wöue und chönne irgendöppis mache. S einzige wo i mim hingrchopf blibe isch, isch asi mi scho immr füre soziauberich interessiert ha bim bügle und ig nie es praktikum ha wöue mache wöuis unnötig gfunge ha, asi nid direkt cha ga studiere...... Ig ha e praktikumssteu gsuecht und becho gha und bi widr zruggzoge zum vattr. Jösses, glaubmer, es isch hert gsi vo 0 uf 70%! (nid 100%, wöu es isch "nur" es prakti im soziale gsi haha) .. Das prakti hetmer de arbeitsistiig so erliechteret. Jez bügli widr "normau" - merke aber, dases nid stabil isch. ig weiss nid, i chamers nid vorstöue über mehreri jahr so stabil zsi und zfride mitm job zsi, allei zwohne, eigeständig zsi. Momentan bini widr daheim bim vatter und "gschützt" vodr wäut. Und wöui äuä afo studiere im herbst, wirdi au bis 30gi da blibe. Und mi hochkant verschulde, sofern ig kes stipendium cha uftribe.

Wasi dir eigentlech chli wet säge mit dem ganze züg:

es isch vrdami schwär usnem tüüfuskreis uszstige ohni drastischi änderige

es git bimir immerno viu setbacks, und wirds äuä au immr gäh. Me muess probiere, nachhaltig änderige i gwüsse sache/verhaltenswiise/denkwiise a tag zlege. "Microhabits" häufe schins. (--> ig hami vo 15 bis 23 so guet wie garnümm bewegt, aues hetmi agschisse wenns astrengend isch gsi. Im praktikum hani närä aubes chönne heilaufe es haubs stüngli. Bi wind u wetter bini gloffe, scheiss egau. Irgendeinisch bini mit öpprem de huusbärg ufegloffe woni mer eigentlech nid zuetraut ha. 2h ufe laufe, phüü. Het aber klappet, mit pöisis. U de hani gmerkt, dass es machbar isch. S nöchst mau bini vo wiiter unge ufeglaufe, 3,5h heimer gha. So kaputt bini scho lang nümm gsi u glich - es hetmi stouz gmacht. Sither troui mr körperlech glich chli meh zue und ha au d fröid dra gfunge)

zviu zit isch nie guet. U weme nid so viu soziaukontäkt het cha eim schnäu d diili ufe gring gheie. Wichtig isch do glaub zit mit sache zvrbringe wo nid "nur" agnehm und eifach si, sondern wo eim vilech au usde komfortzone hole. (--> mit dine körperliche ischränkige chanis nid ischätze und i weiss nid wies bidir finanziell usgseht, aber wenn drs leischte chasch, dini arbeitschraft für wenig/käi geld azbiete: Probiers mit freiwillige isätz im asylberich, altersheim, bimne buur idr nöchi.. ufem märit bim oive vrkaufe.. oder es schlächt zahlts praktikum :D)

Probier dini emotionali lag dire mere chli nöcher zbringe, vilech drüber rede, dass du dankbar bisch und glichzitig frustriert, wöu du di nid vrstange füehlsch. Rede isch würkli wichtig

Und nei, ig bi noni meister voder lag, aber i bi a dem punkt woni d chraft ha, s widr z probiere. So, peace out, gnue gschribe :D