Ich weiss nüm vorwärts und nüm ruggwärts. Siit meh als emne halbe Johr han ich en Fründ, wo recht wiit vu mier weg wohnt. Mier gsehn üs also doch recht selte. Wo ich mine Eltere verzellt han, dass ich mit ihm zeme bin, sind sie alles andere als unterstützend gsi, sondern hen vu Afang ah nume ds Negative gseh. Und statt dass es besser worde isch, wirds nur immer schlimmer. Klar mier sin recht verschiide, mier hen verschiideni Interesse und es anders Umfeld, do er eh Lehr macht und ich ar Kanti bin, aber schlussendlich gohts doch drum, dass mier eifach au Sache hen, wo mier beid gern mached und das hemer ja au. Ich han ds Gfühl minere Mama passt eifach überhaupt nid, dass er e Lehr macht, sie korrigiert und belehrt ihn, wo sie nur chann. Das isch nemis, wo mich komplett uf d Palme bringt. Allerdings muess er fast hüfiger zu mier cho, wie ich zu ihm chann, do er bi mier übernachte dörf (in trennte Zimmer verstoht sich) und ich zu ihm nume für ein Tag dörf. Wenn immer ds Gspröch zwüsched mier und minere Mama uf ihn chunnt, endets imne Striit. Sie motzt an ihm ume, wo sie nur chann und loht keis guets Hoor an ihm. Hüt het sie sogar no gseit, sie hoffi, ich merki früeh gnueg, dass es en Fehler isch. Minem Fründ verzell ich nur öpe d Hälfti vu dem, wo sie seit, aber es het glanget, dass es ihn würkli verletzt het... (und ich han würkli nume das verzellt, wo d Bezüchig selber ahgoht und nid, was sie an ihm als Person uszsetze het) Het irgendnemert en Idee, was me in dere Situation mache chönnt? Ich wär do extrem froh, will so langsam han ichs satt. Ich han scho immer eher es explosivs Verhältnis mit minere Muetter gha, aber so schlimm wie im Moment isch es selte gsi.