Uszieh?
dihay isch alles nur katastrophe, mit 3 viel jüngere gschwüsterte und ehme mami wo völlig überfordered ish. Die ganz zit bechunt mer vorwürf will mer sache falsh macht womer gar nöd macht oder mer macht sie und den sind sie falsh.. ich chan eigentlich nüt richtig mache. Mer läbed vo alimente was aber wit us z wenig isch und ich wo am wenigste choste dihay krieg de ganzi frust ab momentan läbi mehrheitlich bi mim fründ was mer aber au es schlächts gwüsse macht nonstop uf sinere täsche z lige... wenni hei gahn hani halbe panik atake wills so ehn druck uf mir isch. ich selber bin im 18läbensjahr und fang im august mini lehr ah nach dem ich mini ersti abbroche han willis psychish nöd gschafft han mit dem druck dihay also mini frag hett öper erfahrige mit vor 18ni dihay uszieh? Wenn jah wie wo was?
Lg
Antworten
Antwort
Hey :)
Vorwäg: Ich bin erst nach minere Lehr uszoge, ha also erstmal kei direkti Erfahrig mit dem wies du beschriibsch.
Aber ich kah dr trotzdem chli was drzue verzelle, und vllt. en Tipp geh.
E eigeni Wohnig isch tür. D Fustregel isch: D Mieti sött höchstens 1/3 vom Lohn betrage. Und vor allem während dr Lehr macht das e eigeni Wohnig oftmals unmöglich.
E Alternative isch aber e WG. Dr Vorteil an WGs isch, dass es günstiger isch. Zudem lebsch oft mit glyychaltrige zämme, muesch kei volli Irichtig finanziere, und Koste teile sich uf.
Ich glaub dass es durchus möglich isch, mit 18 scho uszieh. Wenn du 18 bisch, bisch erwachse und kasch selber entscheide. Momentan bisch no 17. Ich kah mr vorstelle, dass das ggf. no schwieriger si könnt. Aber mit Zuestimmig vo de Eltere sötts go.
Während dr Erstusbildig stönd dir evtl. zudem no Allimente zue. Und wenns deheime wirklich so schlimm isch, kasch dir das durchus überlege.
Bi mir persönlich ischs ähnlich gsi. Ich han während dr Lehr deheime sehr viel Stress kah. Ha mit mine Gschwister Problem kah, und oft s Gfühl kah, dass ich deheime de bi, wo alles abbekunnt. Ha mi aber denoch entschiede nit uszieh während dr Lehr. Es het sich denn irgendwie verbesseret deheime, aber trotzdem bini denn praktisch direkt nach dr Lehr use. S het sich für mich glohnt. Bereues nit. Klar, es isch tür. Aber es ischs wert gsi.
Lueg mal ob du dir e WG leiste könntisch. Mach es Budget. Rechne dini Koste zämme. Git verschiedeni Muster Budgets online. Und wenns goht, sitz vllt. mal mit dim Mami zämme und besprichs. Lueg d Möglichkeite ah wos git. Und spätestens mit 18 kasch frei entscheide.
Alles Gueti!