< Zurück zur Übersicht
(Seite 1 von 1)

AD(H)S worum ich ?

Pumuggeli
Geburtsjahr
2000
Geschlecht
weiblich
Tätigkeit
Schreinerin

Hey,

Ich ha mich das scho mehr mol gfrogt, ob anderi lüt wo au ADS bzw wie mes mitlerwiele veralgemeinert usdruckt ADHS hend sich so froge stelle wie:

• Worum ha ich ADS?

• Wie würdi si weni kei ADS hetti?

• Het mini mam irgendebbis während dr schwangerschaft gmacht, wo das usglöst het?

• Bini eig dumm? (Das in so situatione, wenni mi nümme konzentriere ka und zb friener in dr schuel wenni wirklich eifachsti Mathe ufgobe nümme oder falsch glöst han, welli eifach so flüchtigkeits fehler gmacht han oder halt eifach wenni nüd me ufneh ha könne(infios))

Bi mir isch es oft so, wenni in sone strudel vo fustration und resignation land, dassi so bescheuerti gedankespiel mach.

Hend ihr au so erfahrige ?

Es würd mich echt meega interesier, wie ihr zu dem stönd oder au wenn ihr kei AD(H)S hend, was ihr für erfahrige mit dem hend.

Lg vero :)

Antworten

Antworten sortieren

Antwort

Wunderfee
Geburtsjahr
2001
Geschlecht
weiblich
Tätigkeit
Fachfrau Gesundheit in Ausbild

Hey du ich han selber ad(h)s meld dich mal

Antwort

Lili
Geburtsjahr
1993
Geschlecht
weiblich
Tätigkeit
Sozpäd i.A.

Hallo Pumuggeli - übrigens coole Name ☺️

Ich weiss, dass das nid Froge gsi sind zum Beantworte, aber ich wett sie dr trotzdäm beantworte, will ich weiss, wie guet dass es tuet, so Sache zghöre! Und mir tuets au guet sie ufzschriebe, will ame bini au total frustriert und wär gärn normal und eifach wie alli anderi - ohnei Problem und ohni ständig aazecke.

Du hesch ADHS, will du d Genvariante drzue vo dine Eltere gerbt hesch und velicht no es paar üsseri Umständ zäme cho sind, wo drzue gführt händ, dass die Genvariante zume Problem worde isch - entweder für dich oder dis Umfäld. Zum Bispiel, dass du ir Schwiiz läbsch wo enorm vill gforderet wird an Leistig (Apassigsleistig zellt do au drzue) und du denn no nid obe uf ere Alp wohnsch, sondern irgendwo mitts ir Zivilisation (zimli stressig unr reizintensiv). Es git es sehr schöns Bild dodrzue, passt jetzt zwar enter zur hyperaktive Variante uf dr erst Blick, aber letztlich isch Hypo- oder Hyperaktivität nur e andri Art und Wiis mit dr Reizüberfluetig umzgo. Magsch Rösser? Also, normali Mensche sind verglichbar mit dene Pfärd wo sit Johrhunderte bim Mensch läbed, die wo super geignet sind zum Springriite, zum Dressurriite, als Zug- oder Arbeitspfärd. Sie sind super and Zivilisation apasst und würded ir Wildniss vermuetli gar nüm überläbe. ADHSler sind hingäge Wildpfärd, eigewillig, freiheitsliebend und absolut überläbenstauglich in freier Wildbahn. Wemer sie aber ifangt und in en Pferch sperrt und sie zähme wött, denn zeiged die dört überhaupt käi apassts Verhalte - im Gägeteil - und unter Druck scho gar nid. Sie sind quasi verhaltensuffällig, sie benämed sich überhaupt nid so wie anderi Pfärd. Die Genvariante wo ir hütige Gsellschaft zume Problem wird, isch sogar für Mensche früener oder abe ebe in andere Kulture en totale Vorteil - ADHSler händ nämli sehr villi Stärke wo enorm praktisch chönned sii!

Wenn du käi ADHS hättsch, denn hättsch du villi vo dine Schwäche nid - das isch wahrschinli das, wo dir so verlockend erschiint. Will die Schwächene mached Problem (isch übrigens bi jedem Mensch so). Aber du hättsch au villi vo dine Stärkene nid. Und das wär zwiifellos sehr schad, denn grundsätzli (wenn nid no psychischi Erkrankige drzue chömed und sie glernt händ mit Stress und ihrne Schwäche umzgo) sind ADHSler sehr umgänglichi, ifühlsami, kreativi Mensche. Hesch dr schomol e Stärkeliste für ADHS agluegt? Näbst de übliche Diagnosekriterie und negative Symptom, gits nämli au die positive Symptom wo mr cha aluege (guet füre Sälbstwärt). Grundsätzli isch ADHS ebe käi Krankheit, sondern es isch e Persönlichkeitsvariante. Und ich würd säge, eini vo de bessere (au wenni sälber durchus drunter liide, dass das en grosse Teil vo de Mensche no nid kapiert het oder nid weiss wie drmit umgo).

Dis Mami het ir Schwangerschaft bestimmt nüt falsch gmacht. Aber wenns dich beschäftigt, denn frog sie doch mol: Mami, ganz ehrlich, wod mit mir schwanger gsi bisch, hesch dört graucht oder Alkoholo trunke oder sunstigi Droge gno? Was du aber wüsse muesch isch, dass erstens au denn es ADHS nur entstoht, wenn die genetischi Veralagig bestoht und die zweitens tatsächli gnau bi dene Lüt wo so "Fähler" mached hüfiger verträte isch (will ADHSler zu unüberlegte Handlige und ebe leider au Abhängigkeite neiged - um dr Faktor 4 erhöhts Risiko!). Also, sälbst wenn dis Mamai öpis falsch gmacht hät, denn wär das glich nid dr Grund für dis ADHS - de ligt in dine Gen - es wär nur eine vo dene unglückliche Umständ, wo drzue gführt hättet, dass es zume Problem wird. Das chönned aber au no Sache spöter i dim Läbe gsi sii, zum Bispiel wenn ihr e schwierigi familiäri Siatuation gha händ oder din Alltag vo de Eltere nid gnueg strukturiert worde isch (und du dodurch zwenig Sicherheit vo usse becho hesch).

Du bisch ganz bestimmt nid dumm. Vermuetli enter ds Gegeteil, es git sogar villi ADHSler mit überdurchschnittlicher Begabig oder sogar Hochbegabig! Mr seit, dass zum Bispiel dr Albert Einstein hät chönne ADHS ha, aber natürlich cha mr das jetzt nüme nachwiise. Aber dä wär jo en überus begabte Herr gsi. Ir Forschigsarbeit trifft mr no öppe ADHSler aa, will dört dr Ideeriichtum sehr gfrogt isch. Und ich dänk, dass d Abwächslig und die trotzdem klare Regle bi gwüsse Vorgäng sehr unterstützend chönned sii. Es git au zahlrichi Promis, wo ADHS händ, zum Bispiel d Emma Watson oder dr Justin Bieber. Villi sind Schauspieler, Musiker oder Sportler - aber das ligt nid dra, dass sie für anders zue dumm gsi wäred, sondern dra, dass ADHSler ussergwöhnlich kreativ sind und en hohe Bewegigsdrang händ (bir hyperaktive Variante). Es git aber au usserordentlich villi ADHSler in pflägende, hälfende oder soziale Brüef - zum Bispiel i miner Klasse simr 5 vo 24 (und übrigens sind das denn gnau die wo d Sächser gschisse händ). Also grundsätzlich cha mr säge, dass ADHSler, wenn sie mol motiviert sind für öpis, dört Spitzeleistige erzieled. Und das wär überhaupt nid möglich, wenn sie dumm wäred. Wichtig isch sich Strategie uszdänke (oder mit Hilf vome Coach oder Therapeut zerarbeite), wie mr die eigne Schwäche in Griff bechunnt. Und für d Schuel cha halt tatsächlich Ritalin sehr hilfrich sii, grad ebe zum so Frustration zvermiide.

Mir händ ir Schuel (also jetzt im Studium glernt), dass Wenn-Dann-Plän super hälfed. Also zum Bispiel: Wenn ich total frustriert bin wäg mim ADHS, denn lueg ich mini Stärke-Liste aa und fröi mich über die Sache wo ich guet cha.

Und letzteres wär au min Rat an dich. Blib nid bi dene negative Gedanke hänge. Versuech dis ADHS zakzeptiere und zlerne drmit umzgo. Erwart nid meh vo dir, als du leiste chasch und klär anderi drüber uf, dass du ihri Erwartige nid erfülle chasch, wenn sie zvill vo dir verlanged. Benutz drbi ADHS aber nid als Entschuldigung, sondern nur als Erklärig und sträng dich trotzdäm so fest aa, wie du nur chasch. Aber bis mitfühlend mit dir sälber, gibt dr e zweiti und e dritti und e zweimillionsti Chance ohni uf dich sälber hässig zsi (oder zumindest nur churz).

Liebs Grüessli, Lili

PS: Chasch mr gärn schriibe, wennd no meh Frage hesch oder nomol muesch ghöre, dass du zwar anders, aber deswäge nid falsch sondern gnau richtig bisch. 😃

Antwort

StreetNinja
Geburtsjahr
1997
Geschlecht
männlich
Tätigkeit
Gärtner

Adhs isch gar ke krankheit chasch mol google isch eifach e arzt gsie wo das erfunde het. Grundsätzlich isch adhs gar nüt schlimms. Mensche wo sich nit so lang konzentriere chöne hend eif überschüssigi energy probier bevor de lernsch oder so eifach mol uspowere

Kommentare

Kommentar
Lili |
Geburtsjahr
1993
Geschlecht
weiblich
Tätigkeit
Sozpäd i.A.

Wenn sie von sich sagt, dass sie ADS ohne H hat, dann musst du erst mal davon ausgehen, dass es sich dabei um die hypoaktive Variante handelt, also die "Traumsuse"-Variante (und nicht den "Zappelphilipp"). Kommt übrigens bei Mädchen tatsächlich häufiger vor. Diese Art zeichnet sich durch geistige Abwesenheit, Verträumtheit, Langsamkeit, wenig Antrieb und eben überhaupt nicht zu viel Energie aus. Sport kann natürlich trotzdem helfen sich zu fokussieren. Und es gibt da auch noch weitere ganz tolle Sammlungen mit Tipps und Tricks und Übungen für beide Ausprägungen des ADHS. Gerade was Schule und Studium betrifft.

ADHS ist tatsächlich keine Krankheit, sondern eine Persönlichkeitsvariante, kann aber Krankheitswert bekommen, wenn der oder die Betroffene (und das Umfeld) darunter leidet. Wie alle anderen Krankheiten hat das irgendwer mal herausgefunden oder meinetwegen erfunden, klar. Aber zu sagen, dass das einfach nur eine Einbildung von dem Arzt war, wird dem Leiden der Betroffenen nicht gerecht. Es gibt auch noch Erwachsene (also im Alter unserer Eltern und so), die irgendwann herausfinden, dass ihre Geschichte von einem bisher unentdeckten ADHS geprägt ist und selbst die sind noch wahnsinnig froh, dass es endlich einen Grund für ihr Anecken und Scheitern gibt.

Antwort

David
Geburtsjahr
1998
Geschlecht
männlich
Tätigkeit
-

Hei Pumuggeli Mini Idee wäre, dasd so Lischte erstellsch wasd chöntisch mache wend so i en Strudel chunsch. Da chan z. B. si go Jogge goh, a episem umeknette, etc.