danke da het mer gad voll die kraft geh!☺️

Sehr schön gschriebe ☺️

Leider wird i üs immer e Maschine gseh (vorallem im Bruef) wo ständig sött funktioniere und wenn me mol nöd cha denn isch me jo schnell ustuschbar.

Ich schaffe au länger nüm 100% will mir Freiziit viel wichtiger worde isch und ich mich denn au besser fühle.

Schad het sich dötsmol es Grundikomme nöd duregsetzt... wär spannend gsi zum gseh wievieli Mensche sich denoch nüm unter Druck gfühlt hetted..

Hey

Danke für din Biitrag. Ich fühle mich genauso wie die beschriebsch.

Ich studiere Vollzit (im 2. Sem.) und han 2 Nebejöb, en Fründ und en Familie wo vell liebi brucht. Ich han ide Vergangeheit immer denkt, dass mich mini jetzigi Situation mega glöcklich wird mache. Ich han hert für das Studium au im vornherein gschaffed nachdem ich zerscht es EFZ und BM gmacht han. Aber ich fühle mich usglaugt, unmotiviert und oft so als wördi kei Luft meh becho.

Vo allne Siite wird eppis vo mir erwartet und ich ben ständig am funktioniere. Ich ben in letschter Zit oft chrank und mi wörds ned wundere wenns wege dem isch. Wenni mim Umfeld das verzelle nimid sie das ned ernscht. So isch es mittlerwiile dezue cho dasi sehr vell Pendenze ha wo sich hüüfe, velli Krankheitstäg wo mini Chefin hessig macht usw.

Und trotzdem denkt min Fründ und mini Familie dass ich das *muess* schaffe will suscht wär eifach eppis ned richtig.

Ich han innerlich scho demit abgschlosse dasi das Semester eh nümm schaff. Han aber glich sehr vell Angscht vor de Reaktione vo mim Umfeld und devor dasi ir Zuekunft bereue mer ned *nomeh* Müeh gäh zha.

Insofern macht mir din Biitrag sbizli Muet und zeigt mer das mer sLebe au anderscht cha näh. Danke.

Danke viel mol für dini Inputs, dass bringsch sehr guet uf d Pünkt! Würd mi sehr wunder neh, in wiefärn du de minimalistischi Läbenstyl usläbsch? Au cha ich alli andere Antworte guet nochefühle. Es isch hart was folgt, sobald me de Leistigsgsellschaft nümm noche mag, us was für Gründ au immer. Viel Rächtfertigunge & no de grösser psychisch Stress, dass spötestens an dem Punkt em Burnout nöcher chunnsch. Umso schwieriger solang kei klari Diagnose gstellt & vo nid ganz so neutrale Fachärzt beguetachtet worde. Ich han sehr viel Traumas in minere Kindheit erläbt, damals in Zeichnereie & Tierinteraktione gflüchtet, spöter in d Arbet. Schaffe isch immer s wichtigste gsii für mini Ahne (so au mich), ohni wenn & aber. So ha ich mi früeh afo körperlich verusgabe, wele zeige was ich ufem ,,Kaste" ha, wele gfalle & mit mine junge Joor nie über Uswürkige noche dänkt. Mitterwile knapp 30gi, Diskushernie, e kaputti Schultere, zittewis chronischi Schmärze vo dene ganze Aspannige, ständig e agspannts Närvesystem, immer wieder extrem erschöpft vo dem ganze Zwüschemenschliche müesse funktioniere .. Erst um die 20ig festgstellt, das mit Depressione & PTS meh beeiflusse als mir lieb isch. Ha nie wele Medis neh, sondern mir immer gseit das ich's au ohni schaff. Irgendwenn an de Punkt cho & glernt au mol chönne Hilf aneh aber als ,,Systemfehler" grad schwer, dass mir öpper fachlichi gueti Betreuuig git & mi begleitet. Immerhin merk ich in de Gspröchstherapie, dassi doch nid ganz so eine an de Klatsche ha wie befürchtet ;) Fallt mir hütt na schwierig Hilf aneh, da ich immer glernt ha wenn öbis willsch, muess sälber nachem rächte luege. So ha ich zum Glück oft e starke Wille gha, wo mir brueflich sehr ghulfe hett. Ich ha mit mim Fliss hochgsteckti Ziel chönne erreiche, vermeintlichi Traumstelle gha & leider immer wieder mit em Körper konfrontiert worde. Bis es sowit cho isch das ich nur na Teilzyt cha schaffe & mit mim Ikomme sowie witere Hintergründ als Systemfehler deklariert worde bi. Us höchstem erstune ha ich tatsächlich e 1/4 Ränte becho aber wohl au einiges ufem Kerbholz. Glich fühl ich mi gfange in dem System. Ich bin e absolut naturverbundene Mensch & find nur dusse die tiefi Rueh. Wär nid alles so kompliziert & vieles verbote, wär ich zfride chönnt ich meh in & mit dr Natur läbe. Au s Läbe als Bsetzer mit Wage interessiert mi sehr oder halt au ufem Camping (au wenn zu viel Lüt). Gärn würd ich das ganze erlernte Fachwüsse direkt in Gsellschaft investiere, ohni übere Arbetgeber. Mit em nötige Chligäld wär wohl au alles viel eifacher, öb sich en Van, Wohnwage, Grundstück oder Ähnlichs z leiste. Aber Gäld isch bekanntlich nid alles & nid wärt sich deswäge schlächt fühle, das me z.B. ufgrund sinere Krankheit in d Schulde gheit isch. Aktuell stand ich wider an dem Punkt, wo ich merk dassi mi wieder eimol meh füre Gschäft verusgabt ha & so guet wie 0 Wärtschätzig bechume. Ich ha das Gschäft behandlet wie mis ,,Baby",da en langersehtnte Kindheitswunsch & so viel guets in de Leitig chönne umsetze. Für das ich grad nur no z leid gläbt wird, vo Machtgeile, unglernte Lüt wo sich als Vorgsetzi schimpfe. Au präge mich diversi menschlichi, schlächti Erfahrige am Arbetsplatz. Mini Energie schwindet immer meh & ich versuechs no zämmehalte, bis ich e neui Lösig gschaffe ha. Leider gohts grad nid mol meh ohni Medis ... Schlimm ... Aber ich weiss genau was nachher füre Ratteschwanz an Ämter chunnt. Do chunnt mir die Bemerkig mit de Gsundheit grad richtig. Zyt öbis z ändere, solang ich no mag & wenns nid goht, denn gohts halt nid. Öb ich wohl no e Stell mit gsunde Worklife Balance find oder evt. no ganz z Hrund gang? Aber genau, es git na ganz viel anders näbst schaffe & au für sich schaffe cha no viel erfüllender sie. Hoff imene Joor cha ich wider drüber schmunzle da alles sin Grund hett & me us allem öbis cha lerne oder s witeri Türe im Läbe ufmacht. Wünsch euch allne au ganz viel Kraft & Muet, au mol us de Rolle z tanze & für sich izstoh.

Wär fühlts? Gärn au persönliche Ustusch, für alli wo froh sind sich irgendwo verstande z fühle mit ähnliche Sorge - Gäbet euch acht!