Heiho :)

Mir gaht au grad nid so super, han aber eigentlich gar nid so vill Grund drzue, usser dass es chli schissig isch ds Studium finanziert zkriege, wenn sogar die Lüüt wo würkli öpis chönned biete arbeitslos wärded, die Sach mit em Gäld schloht mr scho bitz ufe Mage und irgendwie bini drum chli depri und reizbar oder zumindest hani chli Achterbahngfühl. Usserdäm schisst mich dä ganzi Seich mit Corona langsam echt aa, alles wo Spass macht und chli Action het isch entweder verbote oder kostet zvill (Wintersport und so), au wenn jetzt Lockerige chömed so isch glich irgendwie no so vill nid erlaubt, dass es für mich nid so ins Gwicht fallt. Ich wött wieder and Uni (früehstens im Herbstsemester dr Fall), wieder in Sport (Grätturne cha mr eifach nid dusse und ohni Körperkontakt) und in Chor (natürli au verbote), ich wött mit mine Fründe umehänge und cooli Sache unternä (okay, das wird besser) und in Lager go (forget it). Aber eigentlich bini motiviert für ds nöie Semester, die vier Wuche Ferie händ mr glängt und ich wött au nid undankbar sii bezüglich Corona, uns gohts mega guet do ir Schwiiz. Usserdäm findi ds Wätter dusse eifach dr Hammer und sowieso bringt das Gejammer eh nüt. Aber das mit em Gäld, wenn do nid bald was goht, denn chani ds Studium nüm finanziere und das wär scho chli en Seich, wenni deswäge unterbräche müesti und naja, denn chani au no ganz villi anderi Sache vergässe, wie z.B. Fründe mit em ÖV bsueche und so. Die Ussicht macht mi echt chli trurig und verzwiiflet...

Warum gahts denn dir nid guet? Usserdäm würds mi no interessiere, inwiefärn dass es dir hilft, wenn ich dir mini Sorge verzelle, zum drmit klar zcho, wies dir grad sälber goht? Und wieso nennsch du dich Flädermuus, das fändi au no spannend zum Wüsse. :) LG, Lili