2.Lehr sinnvoll?
Hey zämme,
Ich bi jetzt im letzte Lehrjohr vo ere Lehr als Kauffrau (E Profil), vorhär hani d Fachmatur gmacht. Mini Lehr hett mir eigentlich nie wirklich gfalle, aber ich zieh sie dure und möcht dorum nochhär öbbis mache, wo s KV nützlich isch.Möcht aber nit im KV sälber schaffe. Jetzt überleg ich mir, öbb ich an d Fachhochschuel oder e zweiti Lehr als Fachfrau Information/Dokumentation mache söll. Ich möcht ebbe eigentlich Gschicht studiere/als Historikerin schaffe, aber dr Wäg an d Uni isch mir z müehsam...bi dr FH frogi mi eifach, öbbis denn bereu, wenn y scho studier, dass y nit an d Uni gange bi...dorum isch mir die Idee mit dr zweite Lehr in Sinn ko.
Hett öbber vo euch e Tipp für mi? Oder e Zweitlehr gmacht? Wär mega dankbar, wenn ihr schriebe würded. :)
Antworten
Antwort
Gute Tag 👋
Am bestä geisch zure Bruefsberatig, die chöi dir am bestä witerhäufe ih dere Situation. D Frag isch natürlech, ob nume dr Bruef Historikerin für di ih frag chunt oder ou ähnlechi Brüef, wo villech nid ah d Uni muesch gah. Bir Bruefsberatig chöi si der ih däm Fall sicher verschiedeni Wäge zeige, wie ah dis Ziel chunsch. Z.B. Das mit der zwöite Lehr, cha dir nütze aber chönt ou eh Zytverschwändig si, weus anderi Optione chönt gäh. We jedoch unbedingt Historikerin wosch wäre, de muesch di zämmäraffe u de Wäg gah. Es isch zwar eh müehsami u schwäri Zyt, aber dänk dra was du ih dire Zuekunft würklech wosch, u we das di sehnlechst Wunsch isch, de si die paar Jahr nüt dergäge! Lueg dass de Bruef wirsch chönne mache, wo jede Tag Freud hesch, schliesslech müesse mer viu vo üsere Zyt ar Arbeit "opfere".