Du seisch es "fätzt total" und du hegsch Erfahrig - denn isch doch klar: Mach das! Und wennd defür e Usbildig bruchsch, denn gohts dr au nid anders als ganz villne andere i dim Alter. Chasch es jo bruefsbegleitend mache und glich witerhin dört schaffe. Sozialpädagogik oder soziakulturelli Animation wär wohl die geignetsti Wahl zum als Jugendarbeiterin zschaffe. Bezüglich dim Gfühl es seg nid din Platz: Warum hesch das Gfühl? Am Job chans jo eigentlich nid ligge, will de macht dr jo Spass. Fühlsch di im Team nid wohl? Und wie lang schaffsch eigentlich scho dört?

Wo bisch denn im Usland gsi? Hesch no Kontakt zu de Lüüt dörte? Velicht chasch dr es Erinnerigsalbum gstalte, dir regelmässig Föteli schicke loh etc. Das chan hälfe mit em Vermisse besser zrächt zcho. Und natürlich wärs au ganz wichtig, dass du dir do ir Schwiiz en guete, liebevolle, stabile Fründeskreis zuetuesch - und ich säg bewusst Kreis, will din Fründ längt nid. Ich dänk, das weisch du au. Ihr bruched beidi Fründschafte usserhalb vo öirer Beziehig.