Blokier die fake friends die bruchsch ned.....

Meld di süst mal

D Mensche sind jo alli völlig verschiede und händ unterschiedlichi Interässe, Wärt, Stärke und Schwäche. Punkto Beziehigsgstaltig findi, dass dich doch drei Menschetype unterscheide lönd.

Es git derigi Type, wo sackstark drin sind Kontakte ufrächt zerhalte, in Beziehige investiere, Bekannti zu Fründe zmache und drfür zsorge, dass keine (au nid sie sälber) vergässe goht. Oft sind das enter die unschiinbare Lüüt wo sälber licht vergässe gönd und nid zu de super beliebte ghöred, obwohl sie eigentli jede irgendwie mag. Oder die wo schüch sind, eher introvertiert oder sunst e Macke händ. Sie müend um Beziehige kämpfe und sind zu wahre Meister gworde, wobi sie müend ufpasse nid zklammere oder Sache zerwarte bzw. zfordere wo anderi Type nid chönned gä. Zum Bispiel ds gliche Engagement für d Beziehig.

Es git nämli au derigi Type, wo es riisigs sozials Netz händ, überall Vitamin B, sehr verplant oder aber au sehr spontan, allsits beliebt und super connected sind und sich am liebste in ere grosse Gruppe ufhaltet, wos uf dr einzelni nid so druf aa chunnt. Die zeiged meist sehr wenig Engagement in Beziehige, will sie vill zue beschäftigt sind und vor allem vill zue vill Kontäkt händ - es isch ihne gar nid möglich sich immer bi allne zmälde, drum beschränked sie das uf ihri BF und ihre Partner. Das sind die Mensche, wo eim plötzlich us em nüt use mol chönned froge wies eim goht, wenn mr sie scho längst ufgä het, eifach will sie grad an eim dänkt händ. Oft sind das aber au gnau die Mensche wo die ersti Gruppe liicht kennelernt, will die offe, fründlich und fröhlich sind und uf andri zuegönd. Mit dr dritte Gruppe klappts bi ihne nid do guet.

Das sind die Type, dene ängi Beziehige wichtig sind, wo mega gärn gäbed und für ihri Fründe do sind, wo total sozial, sensibel, lieb und hilfsbereit sind und oft au in hälfende Brüef unterwägs sind. Sie sorged immer gärn für anderi und vergässed schnäll emol sich sälber, muetet sich meh zue, als ihne guet tuet und bruched denn wiederum vill Ziit zum wieder zu Kräfte zcho. Denn sind sie sehr mit ihrer eigene Psychohygiene beschäftigt, bruched vill Rueh und Ziit ohni andri Mensche zum sich erhole, zum Bispiel bi kreative Sache. Dodurch sind sie sehr schlächt drin Kontäkt ufrächt zerhalte, aber froh drum wenns die anderi Person macht, will ihne an dr Beziehig durchus öpis ligt. Sie sind eigentlich druf agwiise, dass sich Lüt bi ihne mäldet, will sies dälber nid ufd Reihe bechömed. Drum isch es für sie super Lüät us dr erste Gruppe als Fründe zha.

Natürlich gits au no Mischige drvo. Usserdäm gäbtis au no Einzelgänger, wo gar nid so es grosses Bedürfnis nach Beziehige händ. Ich weiss nid, was du für en Typ bisch, aber es chönnt sii, dass du zur erste Gruppe ghörsch, wenn du dich beklagsch, dass sich dini Fründe nie mäldet. Ich bin sälber e Mischig zwüsche em dritte und em erste Typ und ich ha mi au scho ewigs drüber gärgeret, dass sogar bi minere BF (klassische Typ 3) immer ich mich mues mälde. Sie git sich immer wieder mol Müeh, wenn mr drüber gredet händ, aber gänderet het sich nie würkli öpis. Ich weiss eifach, dass sie ihres Beste git und dass sie mich trotzdäm gärn het.

Ich dänk es isch ganz wichtig, fählendi Kontaktufnahm oder au fählends Antworte nid eifach als fählends Interässe zbewärte. Ich ha jetzt au grad e Fründin (Typ 3 mit bitzli Typ 2) agmotzt, will die mr sit 3 Mönet nid mol richtig antwortet, geschweige denn sich mäldet. Sie het sich entschuldigt, aber au gseit, dass sies grad nid ändere cha. Ich chönnt jetzt säge, dass sie e schlächti oder sogar falschi Fründin isch, aber das wär eifach nid wohr. Und das weiss ich eigentlich, au wenns sich ame im Momänt anders afühlt. Meistens händ Lüüt gueti Gründ gür das was sie mached - es goht ihne velicht nid guet, oder sie händ Stresss oder sind früsch verliebt.

Apropos früsch verliebti Päärli... Die sind tatsächli ame es bitzli müehsam. Aber als Fründin cha mr sich eifach säge, dass das au wieder verbi goht. Irgendwenn (nach 1-2 Johr), legt sich das au langsam und mr cha mit dr Person au wieder öpis afange. Wenn bis dörthi d Fründschaft nid futsch gange isch - und für das mues mr glatt en Typ 1 sii. Mini BF het am Afang vo ihrer Beziehig chum meh mit mir abgmacht, überall ihre Fründ mitgschleppt, mich vergässe und wenn sie sich doch mol Ziit für mich gno het, het sie permanänt vo ihm verzellt. Zum Glück hämer die Phase dure! Mir händ uns dört es paar Mol ind Hoor kriegt wäg dem, aber ich bin sehr froh, dass mirs gschafft händ trotzdem besti Fründinne zbliibe. Es isch es wärt gsi.

Das chani dr au für dini Lüüt säge: Überleg dr welli vo dine Kollege dass es würkli wärt sind zu ihne Kontakt zha und ind Beziehig zinvestiere. Und dr Räst, bi dem chasch di jo ab und zue, all paar Mönet mol mälde. Velicht ergit sich öpis drus. So mach ichs uf jede Fall und das klappt eigentlich ganz guet. Und so chani mini Stärki niemerds zvergässe au guet nutze, d Lüüt fröied sich nämli immer vo mir zghöre, wills bedütet, dass ich an sie dänkt han. Das sägi ame au. Und für mich isch es au voll okay so, ich bi nüme enttüscht wenn sie sich nid bi mir mäldet oder au mol nid antwortet, will ich ufghört han zversueche öpis zsi oder zwärde wo nid mögli isch.

Blocke...ganz eifach kennes säuber zu guet....u ja so mönsche hei di nid verdient.