Hey Wenn dich das noch so langer Ziit immer no beschäftigt, dene würd ich dir Vorschloh das mit professionelle Therapeut z'behandle. Weg us minere Sicht machts kei Sinn epis z'verdränge, weg es chunt immer wieder ue. Sondern mo setti so Sache verarbeite nur dene chan mo es Stückwies losloh.

Für de moment würd ich dir au Vorschloh das was passiert isch mit allne Gfühl niederzschriebe oder epertem die ganzi Gschicht vo A - Z verzelle chan au helfe.

• hesh irgendwie mol richtig chöne abschied neh?
• Willsh denn überhaupt sho abshied neh fühlsh di dezue bereit?
• Hesh der scho mol Gedanke gmacht wie da mache chöntish?

Falls nöd, i hoff i ha chönne öppis is rolle bringe i din kopf. Und wennd di nonig bereit dezue fühlsh, versuech die positive Sache zgseh (i weiss da ish eifacher gseit als gmacht) Probier Sache us. Weiss au nöd .. zB mit Bus mit dem du oft fahrsh, eifach mol ad Endstation fahre, eifach weils di Wunder gnoh het.

Eifach Sache mache wod scho immer mal hesh wölle aber no nie gmacht hesh .. au wenns nur die Endhaltestell ish 😁

Hoi du!

Ich cha dii völlig verstah. Ich ha den mii immer im zimmer ihgsperrt &bii nid usegange & ha immer ah mini sis denkt...Ich ha denn aber mal öppis mit minere beste kollegin gmacht & das het mega abglenkt. Ii schlah dir vor, dass mit anderne use gahsch & mit ihne spass hesch. Schoklar, cha mah so en verlust nid vergesse & da isch au s'ziel. Er wird immer bii dir im härz sii, aber ablänkig tuet au guet.

Meld di mal❤ bin für di da

Ich han zwar niemert so verlore wie du, aber wend schribe möchtsch, dörfsch mich gern ahschribe : )

Vor 9 Johr isch min chline Stiefbrüeder gstorbe, ich chas dr also öppe nochfühle... Ich han mi sicher es halbs Jahr jede Obe in Schlaf brüelt, denn isch es sältener worde. Inzwüsche hets fast ufghört, so laaangsam chani an ihn dänke und vo ihm verzelle ohni dassi richtig trurig wirde und verbring au Geburts- und Todestag nüme brüelend. Aber fähle tuet är scho immerno und für mich isch es au immer wieder schwär zakzeptiere, dass ich käi Schuld a sim Tod ha bzw. en nid hät chönne verhindere.

Wenn mr Persone verlüürt wo eim nochgstande sind, denn seit mr, dass d Truurziit öppe 10 Johr duret. Mir het das gholfe zum Wüsse, dass es völlig normal isch au no nach 5 Johr zbrüele und Kummer zha. Wichtig isch bim Truure eifach, dass mrs au würklich zuelosst. Ds Läbe goht witer und es isch ganz wichtig Ziite zha, wo mrs lustig het und fröhlich isch. Aber au d Truur dörf ihre Platz ha - zum Bispiel grad an so bsunderige Täg wie en Geburi. Und verstah cha mr dr Tod gläbe nie - mr cha en nur akzeptiere. Ds Läbe vo mim Brüetsch het a dem Punkt gändet, wos hät sölle ände, au wenns für uns wo zruggbliebe sind zfrüeh isch gsi.

Du seisch du suechsch Ablänkig. Das cha grundsätzlich alles sii, wo dir guet tuet. Das muesch sälber chli usefinde, was dir hilft. Gsellschaft isch bestimmt sehr hilfrich, aber drbi muesch ufpasse, dassd nid emotional vo dim Umfäld abhängig wirsch und ds Eleisii denn gar nüme vertreisch. Und ebe Ablänkig isch nur guet, wenn sie nid zur Verdrängig führt. Truur wird vo sälber besser, wemer ihre gnueg Ruum git. Aber ime gsunde Rahme und innerhalb vom Truurprozässe. Wenn du mit em Schritt vom Anää es Problem hesch, denn söttsch di zu dem mol mit diner Therapeutin bespräche. Will das wär denn wiederum nid gsund nach so vill Ziit.

Ich an diner Stell würd mit mir sälber abmache zu wellne Ziite d Truur Platz het und in wellne ds ganz normale Läbe im Vordergrund stoht. Zum Bispiel chasch säge, dass du dir jewils am Samstig Morge Ziit nimmsch zum an ihn dänke, velicht au es Bild für ihn mole, en Brief schriebe, es Gedicht wod für ihn gschriebe hesch läse etc. Am Samstig Morge lohsch d Truur ganz bewusst zue. Und ir rästliche Ziit seisch ihre, sie seg okay, sölli sich aber im Hintergrund halte. "Es isch okay, ich merke, dass du da bisch. Ich bruch jetzt Ziit für mich und mis Läbe, aber am Samstig nimm ich mir Ziit für dich. Versproche." Das chan mega hälfe. Und mit dr Ziit chasch es denn immer sältener mache, bis du denn velicht wie ich bi de bsundere Täg aglangt bisch...

Vill Chraft wünschi dir!