Borderline isch für e Fründschaft immer usefordernd, in ere instabile Phase natürlich erst rächt. Es isch ganz toll vo dir, dass du so vill Geduld mit dinere Fründin hesch. Und es isch au richtig und wichtig, dass du ds Borderline als Ursach vo ihrem Verhalte erkennsch. Aber au Borderline entschuldigt nid, wenn sie sich dir gegenüber mies verhaltet. Es isch für dich und für sie wichtig, dass du ihre rückmäldisch, was dir Müeh macht. Ich verstand dini Sorg und ich verstand au dis Mitgfühl, aber du machsch ihre absolut kän Gfalle drmit, wenn du alles abeschlucksch. Will irgendwenn wirds dr nüme glinge und denn wirsch du mindestens ebeso grob zu ihre oder du laufsch ihre drvo. Und beides wär für sie umso schlimmer. Red mit ihre drüber. Über das wo di verletzt, aber au drüber, dass du dir Sorge machsch. Und velicht au dass das mit de Medikamänt absetze nid grad eini vo ihrne beste Idee gsi isch und sie sich mues bewusst sii, dass es sie destabilisert - und dass du das gmerkt hesch. Dass du für sie do bisch und sie so guet wies goht wöttsch unterstütze. Aber dass du au numme en Mensch bisch - und en sensible no drzue. Versueched zäme e Lösig finde für so Momänt, wo d Emotione mit ihre duregönd. Wie chasch du dich denn verhalte, damits ihre am meiste hilft. Und wie chan sie sich verhalte, zum nid alles uf dich ablade. Ihr sind beides schlaui Mäitle, euch fallt scho öpis ii. Wichtig isch eifach, dass ihr euch en ganz gnaue Plan mached und de zum Bispiel au zäme ufschrieben und no kreativ gstaltet. Quasi en Vertrag wo für beidi verbindlich isch. Und was ihr tüend, wenn sich öper nid dra haltet - zum Bispiel am nögste Tag zäme es Kaffi go trinke und drüber rede. Ajo, mit ihre rede söttsch natürlich nie denn, wenn sie eh scho völlig näb de Schueh isch - also nid im Konflikt ine. Das git nur nomeh Ärger. Sie mues sich zerst chli abküehle und wieder vom norfallmässige Handle ins verstandesmässige Dänke inecho. Also wart au für das Gspräch drüber wies dir goht mit ihrem Verhalte en günstige Momänt ab - es eilt jo nid. Und ich weiss, es cha echt schwierig sii, eso offe mit öperm zrede. Aber letztlich git ihre dini Transparänz au wieder Sicherheit. Und dini Ehrlichkeit zeigt ihre - zumindest wenn sie im Nachhinein drüber nochdänkt - dass es du guet mit ihre meinsch. Und das isch grad für Borderliner mega wichtig.