Fühl mi Lost und einsam
Heey i vrsuechs its ou eifach mou.
Fühl mi so guet wie jede Tag eifach nume einsam und ungliebt und aus ob sich niemerds für mi interessiere würd, was leider ou so isch. I lug immer wider ufs Handy und erhoff mir das irgendwenn mou e Nachricht vo dere Person uf mim Handy ufplobt, wos bis jetzt noni i mim Läbä git! (Maybe you know what i mean)
Und s schlimme isch es git so viu Girls wo mir wprde gfaue und i eigentlich ou gärn würd asprächä aber für das bini eifach viu z schüchtern und dänkä z negativ.
Auso eigentlich woti drmit eifach nume sägä dasi endlich mou öber wot kenne lerne wo mi liebt so wieni bi. Gäge Fründschafte hätti zwar ou nüt drgägä, aber für das bini irgendwie nid gschaffe.
Zu mir säuber wird im März 22, wohne siteme haube Johr its z Schönbüehl und kenne hie sowieso niemerds. Bi ne Technikfreak wo zockt und YouTube Videos macht und Netflix suchtet.
Faus interesse hesch mi kenne z lerne de chasch mir gärn hie schribe faus das möglich isch oder uf Instagram.
Antworten
Antwort
Hei Jens
Ich weiss, das isch jetzt nid die Antwort, wo du dir erhofft hesch. Aber trotzdäm möchti dr es paar Sache mit ufe Wäg gä: Ich cha guet verstah, dass du dich nach eme Mädel an dinere Siite sehnsch. Aber ich gse au chli e Gfahr, dass du enttüscht wirdsch wärde, wenn du alles uf ei Person setzisch. Weisch, kän Mensch uf dr Wält cha dir alles gä wo du bruchsch. Und es cha dr zwar hälfe, wenn du öper do isch wo di gärn het, aber es löst dis Problem mit em ungliebt und einsam fühle nid. Will das steckt irgendwo in dir drin. Dini Frau wird dich nie eso sehr chönne liebe wie dus bruchsch und sie wird nie immer chönne nur bi dir sii. Du wirdsch dich au mit ere Beziehig ame ungliebt und einsam fühle. Das isch en Teil vo dir und het mit ihre nüt ztue. Ich ganz wichtig, dass du das weisch und dir au bewusst bisch, dass es sie wird überfordere, wenn du vo ihre erwartisch, dir alles zgä, wo du bruchsch. Au söttsch dr, grad wennd zum negative Dänke neigsch, immer wieder bewusst mache, was Realität isch und was du nur interpretiersch oder befürchtisch. Lueg, dass du da dr Realitätsbezug nid verlüürsch und au, dass du dis negative Dänke nid uf ihre abladsch. Und naja, d Basis fürne gsundi Beziehig isch jo eigentlich Fründschaft. Ich bin mr aber ganz sicher, dass au du ir Lag bisch, Fründschafte ufzbaue und zerhalte. Und das wo du us dine Fründschafte - egal ob zu Jungs oder Mädels - lernsch, das chasch när mitnä ind Beziehig als die fortgschritteneri Version vo Fründschaft. Übrigens, no en Tipp: Statt nur es paar allgemeini Stichwort über dich zschriibe, überleg dr was di interessant macht und velicht chasch jo sogar formuliere, was du dir vo dim Girl bzw. dere Beziehig würdsch wünsche und was du bereit bisch zgä. Ich wünsch dr ganz vill Erfolg! Liebs Grüessli, Lili PS: Bisch jetzt eigentlich 1991-Johrgang oder 21gi? Do gits e Diskrepanz zwüsche dim Geburtsjahr und diner Altersagab im Post. 😉
Kommentare
Kommentar
Stimm dir mehrheitlich zue. Jedoch denk ich nöd, dass d Basis vo ere Beziehig Fründschaft isch. Es het zwar Gmeinsamkeite mit ere Fründschaft (z.B. Vertraue), aber ich denk Fründschaft isch doch vo de Art her klar was anders. Ich merk sehr schnell bi Fraue, obs für mich rein fründschaftlich isch oder obs meh si chönt (was bi mir nöd primär vo de Optik abhängt), es isch eifach ganz ä anderi "Energie". Ich wür genauso wenig säge, dass Familie Fründe sind oder Fründe Familie. Es sind eifach unterschiedlichi Arte vo Beziehige und alli sind wichtig. Ich find dini Ussag chönt ihn ziemli uf de Holzweg bringe, da wenn er Fraue wie Fründe behandled (und nöd wie ä potenzielli Partnerin), er eifach nur gfriendzoned werde wird. Wie gseit überschniidige giits, aber es isch nöds gliiche. Din Tipp am Schluss findi prinzipiell au guet, aber definitiv söt er zerst mal Fründe finde (egal welles Gschlecht) und sich es Lebe kreire wo ihm gfallt bevor er au nur a ä festi Beziehig denkt.
Kommentar
Hei Milo Hm ja, das wo ich mit Fründschaft als Basis für e Beziehig mein, isch gläbs öpis anders als du drunter verstande hesch. Zerst emol, mit Beziehig han ich fix e Partnerschaft gmeint. Und ja, klar, du hesch rächt, e Liebesbeziehig isch öpis anderes als e reini Fründschaft. Grad uf dr emotionale Ebeni und natürlich au punkto (sexuelli) Aziehig laufed do ganz anderi Sache ab. Und natürlich behandlet mr sin Partner nid glich wie alli andere, das chan jo nid funktioniere. Ich dänk, dr Partner erwartet scho, dass är oder sie öpis Bsundrigs isch...
Aber glich isch Fründschaft d Basis uf dere e Partnerschaft im Idealfall ufbaut - und nid irgendwelchi Bedürfnis wo sötted gstillt wärde oder eifach nur Lust uf Sex. Ersteres führt in e Abhängigkeitsverhältnis ine und letzeres isch en billige Abklatsch vo dem was e Partnerschaft chan und söll sii. Ich han jo gseit, es seg die fortgschritteneri Form vo ere Fründschaft - mit meh Nöchi, meh Intimität, meh Zärtlichkeit, meh Higab, meh Läbeteile und natürlich au meh Konflikt.
Zum Verstoh wasi mein isch es aber wichtig, zerst emol zdefiniere, was Fründschaft denn überhaupt isch. Das isch nämlich e sehr e bsundrigi Form vo Beziehig, will sie uf Freiwilligkeit berueht. Das isch en krasse Gegesatz zur Familie, wo mr jetzt eifach echt käs Mitspracherächt het. E Fründschaft isch also e usgwählti Beziehig, genau wie au e Partnerschaft. Und sone Beziehig mues pflägt wärde, das heisst, sie ent- und bestoht nid eifach so, sondern brucht Investition vo allne Beteiligte.
Zum chönne gueti Fründe ha, mues mr allermeistens zerst oder je nach dem mitenander lerne en guete Fründ zsii. Das heisst, mr mues mega an sich schaffe, will meistens gheit mr leider nid als guete Fründ vom Himmel. Die Tugende oder au soziali und personali Kompetänze wo mr so lernt, die brucht mr au in andere Beziehige - mit dr Familie chli weniger, in ere Partnerschaft aber drfür umso meh. Mr nennt das wo mr sich dodrmit erarbeitet au Beziehigsfähigkeit. Ohni die laufts nid, scho gar nid im Fortgschrittenemodus. Und deswäge isch es eso mega wichtig, dass vor ere Beziehig scho ächti Fründschafte bestande händ. Will sunst liidet dr Partner drunter, dass mr quasi bi null mues afange und das isch sauschwer und glingt allermeistens nid.
Und ja, din letzte Punkt findi ebe au: E Partnerschaft darf nie drzue do sii, dass mr mit em Läbe chan zfriide sii. Das isch dr ultimativi Beziehigskiller (nid nur bi dere Sorte sondern au bi normaler Frünschaft) wemer vom Gegenüber erwartet, dass är oder sie eim glücklich macht. Das isch e Erwatig wo nid erfüllt wärde chan. Und au nid söll oder dörf, sunst simer wieder bi de Abhängigkeitsbeziehig. In dem Fall würdi au säge, zerst Fründschafte zu andere Jungs und Mädels ufbaue, Hobbys finde wo usserhalb vo de eigete vier Wänd stattfindet, es eignigs Läbe ufbaue und drmit happy sii. Und uf das so entstandene "Muffin" cha denn e Fründin no als "Topping" obedruf cho und ds "Cupcake" isch komplett.
LG, Lili