Danke vielmal für dini Antwort. Aso sie würd sich halt abzeichne lah, ned fotografiere.

Warums mich stört isch eifacht: Ich finde inere Beziehig söll de Partner zu de wenige Persone ghöre, wo eim Nackt derfed gseh.

Sie gseht das anderst. Es segi ja rein brueflich.

Und drüber rede will weder ich no sie so wükli, will die einzig Lösig woni wükli z friede wär, wär wenn sies ned würd mache und denn wirds immer grad mega emotional... Ich gseh kein kompromiss. Das isch ned guet, ich weiss, aber ich gsehns eifacht ned.

Es verletzt mich und regt mi richtig uf, wenni drah denk, dass sie vor anderne lüüt zwei stunde nackt dastaht.

Schlussendlich wird sies mache. söll sie au. Ich weiss eifacht wükli ned, wie ich demit söll umgah.

Ich verstand dich voll. Das mit em alleinige Nacktheitsaspruch. Das findi au. Aber vor allem findi, dass sie sich hät müese froge bzw. mit dir drüber rede.

Im Sinn vo "Hei Schatz, ich bi agfrogt worde zum Modäll sitze und ich würd das mega gärn mache. Aber ich cha mr vorstelle, dass du das nid so lässig findsch, wills sich ebe um Aktmolerei handlet, drum han ich zerst mit dir wölle drüber rede. Weisch, es het überhaupt nüt mit unserer Beziehig ztue. Und au nid drmit, dass mich das irgendwie atörne würd oder so. Für mich isch das eifach e Useforderig und es macht mi gwundrig wie mr sich drbi wohl fühlt. Usserdäm isch mini Kollegin, d Selina unter de Studis, ich möcht ihre gärn de Gfalle tue. Und hei, muesch echt nid iversüchtig sii, die andere kenni alli nid. Weisch was, ich frog, ob ich e Foti vo eim vo de Bilder chan ha. Und das isch denn für dich, denn hesch au öpis drvo. Bitte Schatz, es wär echt min grösste Wunsch dört mitzmache. Bitte sig mr nid bös!"

Ich glaub, dass du dich velicht unter anderem au drum ärgerisch, will dus scho als halbe "Betrug" aluegsch und sie überhaupt nid. Und statt dich zberuhige, beharrt sie druf, dass sie im Rächt isch und sie mache cha, was sie will. Weisch, du chasch sie würkli nid dra hindere. Aber du chasch e solang mit ihre drüber rede, was es mit dir macht, bis es dir besser goht. Und sälbst wenn sie trotzdäm Aktmodel wird, chasch du drüber Friide ha - du muesch drfür chli an dir schaffe, aber es isch möglich. Drfür müend ihr eifach zerst mol vo dr Sachebeni (mache oder nid) uf die emotionali Ebeni cho bi öirem Gspräch. Und du dörfsch diner freiheitsliebende Fründin nid ds Gfühl gä, dass du sie wöttsch ischränke. Sondern du muesch ihre ds Gfühl gä, dass sie dir eifach mega wichtig isch. Ich weiss, über Gfühl rede isch für villi Männer nid so eifach, aber probiers eifach.

Au für anderi Fäll wo dir öpis gäge dr Strich goht, chasch drmit afange, dass du zerst mol überleggsch, warums dir eigentlich eso nid passt. Dini Gfühl wänd dir normalerwis öpis säge - nid über die anderi Person, sondern über dich sälber. Find das use und denn red mit diner Fründin drüber. Erklär ihre, warum du nid toll findsch, was sie vor het. Und denn sueched en Wäg, damit du dich besser fühlsch. Weisch, als Frau isch sie vermuetlich Expärtin in Sache Gfühl. Je nach däm längts au scho, dass du usefindsch wohär dini Gfühl chömed und dich denn bewusst entscheidisch, dass sie käi Macht dörfed ha. Zum Bispiel chasch dr säge, dass du diner Fründin vertraue willsch und du drum käi Ifersucht ufcho losch. Und denn kämpfsch drgäge a. Aber ebe, zerscht hesch d Ufgob usezfinde, warum du überhaupt ifersüchtig bisch - und zwar nid, was sie gmacht het, dass dus bisch, sondern was dini Erfahrige mit dir mached, dass du dänksch, ifersüchtig sii zmüese.