Hey

Ich ka mi leider nit exakt in dini Situation ineversetze, well ich no nie e Fründ ka ha, aber vlt hilfts dir z läse, was öbber anders dänggt.

Ich bi vor drei Johr sälber anere schwäre Psychose erkrankt, was natürlich für mi dr Horror gsi isch, aber au mi Umfäld sehr belastet hett. Ich ha denn, wo s mir e bitz besser gange isch, gmerkt, dass mini Familie und Fründe stark drunter liide und ha beschlosse, in e Klinik z go, was mir enorm gholfe hett und d au mis Umfäld entlastet hett. Viellicht wär das für di Fründ au e Schritt? Es brucht extrem viel Muet, sich so z entscheide, aber es isch au e Chance und würd eventuell au d Verantwortig vo dir wäg näh. Ich finds extrem stark vo dir, dass du ihm möchtsch hälfe und s isch völlig normal, dass du mängisch nit so magsch. Wenn di Fründ aber in ärztlicher Behandlig isch, wirds im ziemli sicher irgendwenn wieder viel besser go und denn wird är das hoffentlich sehr z schätze wüsse, dass du für ihn do gsi bisch. Ich ha vor dr Psychose e soziali Phobie ka und sit y sie überwunde ha, ka ich viel besser mit Mensche umgoh, well y gseh ha, dass anderi für mi do sinn. Ich hoff für di, dass es sich bi dir und dim Fründ ähnlich entwicklet. Wichtig isch aber au, dass du au uff di luegsch. Du bisch nit ellai zueständig, dass es ihm guet goht und am allerwenigste nützt s ihm, wenn s dir nit guet goht. Ich weiss nit, was dir guet duet, viellicht di ablänke oder drüber rede. Wenn s di fest belastet, könntsch jo au in e Therapie go, dört lernsch sicher au öbbis über dr Umgang mit Psychotische. Uff jede Fall: 1. Toll, dass dir di Fründ so wichtig isch!!! 2. Acht druff, dass es di nit z fest abezieht und 3. hol dir Hilf, wenn de sie bruchsch

Alles Gueti dir und dim Fründ! :) Und sorry für die langi Antwort