I han en kollegchreis vo zwei guete Fründe, dä Fründin vom einte, d‘Kollegin vo däre Fründin und emne wietere Kolleg. Wie mer merkt isch das Grüppli us mir und mine zwei Kollege drus use gwachse, was das ganze ned grad eifach macht. Da dä einti ä Fründin het, het er praktisch kei Ziet meh für garnüt abgseh vo sim Hobby. Dä ander het en Kolleg gha, dä ihn zu grössere Partys mitgno, wo er agfange het abstürze mit däne. Ich bin scho sit mim 16 Läbensjahr verfächter gsi vom Alkohol und han au nüt gtrunke, genau so wie dä Kolleg mit dä Fründin. So isch alles chli druf usecho, dass euses Grüppli sehr gspalte gsi isch; dä eint bi dä Partys, dä ander bi sinere Fründin mit dä Kollegin und ich bin meh oder weniger ellei zrug g’bliebe.

Doch dänn bini uf d‘Idee cho s‘Trinke au usprobiere zämme mit em Partykolleg. Also sind mer z‘dritte a emne Abig abgstürzt (mis erste Mal) und a dem Abig isch eusi Beziehig irgendwie wieder chli ufgblühet. Ich han aber damal welle dass es niemert erfahrt, da ich eig. bi minere Prinzipie han welle bibhalte und es echli komisch wär, wenn ich säge ich tränki ned aber gliechzietig so Hschiche umegönd. Das het au zuemli guet funktioniert, bis es öpper us em Grüppli usegfunde het. Natürli spricht sich das ume. Niemert hets irgendwie schlimm gfunde ussert so ussert halt d‘Fründin vo eim vo minere guete Fründe. Die het mich hert kritisiert, dass ich ned mini Prinzipie chönti bhalte (ned so wie ihre Fründ) und dass ich en Mitläufer wär.

Jetzt macht sie in letschter Ziet immer so en kritische Blick wenn mer eus gsehnd und sie redet chum meh mit mir. S‘Grüppli isch irgendwie no meh gspalte als zuvor (oder zumindest bin ich meh darus usgschlosse worde, han ich s‘gfühl).

Meh alk wird ich sicher ned trinke (han bis jetzt grad mal 3 mal gha), ich überlegg mer eher wieder demit ufzhöre.

was meinet ihrh dezue? Hend ihr au scho so situatione gha?