Sinn vom Lebe
Ich ghöre ja selber zu dene Lüt wo sich immer wieder drüber lustig mached, dass mer jetzt drüber diskutiered, was de Sinn vom Lebe isch, aber ganz ehrlich, ich frage mich das würklich.
Wieso gits üs Mensche? Was machemer uf dere Welt und wieso? Was isch s Ziel? Wieso setti eppis erreiche, wenni am End doch stirb? Und so wiiter...
Irgendepper e Meinig dezue, wil wüsse chamers ja ned würklich...
Antworten
Antwort
Vany
Ich han mir das so beantwortet....
Ich bin en gläubige Mensch und glaube das mir Mensche da sind mit dem Ziel epis guets zhinter lah anderne Mensche zhelfe eus zbilde und das bis Gott eus zu sich hollt...
das tönt oberflächlich aber das ish die schnellst erklärig wo ich han 😅
Antwort
Hey vany
Wow, das isch echt e gueti Froog. Stelli me au oft.
Für mich gsehts so us:
Ich bin nit religiös. Ich glaube nit an d Bibel, oder an Koran, so wie alles dert dinne beschriibe isch. Aber ich glaube, dass egal ob du an Jesus Christus, Buddah oder d Evolutionstheorie, jede schlussendlich ans glyyche glaubt.
Lueg, für en Christ isch dr Mensch und d Welt in dr Schöpfigsgschicht entstande. Für en Atheist isch dr Urknall dr Uslöser vo allem. Was aber wenn beides s glyyche isch, eifach anders beschriibe?
Ich mein: Gott het gem. Bibel d Welt in 7 Tage erschaffe. Gem. jedem Wisseschaftsbuech isch dr Prozess bis zu uns Mensche Milliarde vo Jahre gange. D Bibel definiert aber nit, wie lang eine vo dene 7 Tage gsi isch. „Am ersten Tag schuff Gott das Licht“ isch eifach d biblischi Version vom Urknall.
Wie gseit, ich glaube dass egal wellem Glaube me aghört, me schlussendlich irgendwie ans glyyche glaubt, eifach anders formuliert. Ich glaube, dass alles im Lebe en Grund het. Ich glaube an Schicksal und ich glaube nit an Zuefall. Ich glaube dra, dass alles was mir mache, uns zu nem Ziel aneführt. Ich glaube, dass mir unsere Weg beiflusse könne, dass aber egal welle Weg mir nehme, jede Mensch zu sim Ziel chunnt.
Für mich isch dr Sinn vom Lebe dr Weg. S Ziel isch nit beiflussbar. Aber dr Weg isch es. Mir entscheide wie mir unsere Weg gstalte. Mir entscheide, wie mir lebe möchte. Mir entscheide, mit wellne Mensche mir uns umgebe möchte. Dr Sinn vom Lebe ischs Lebe. S Lebe das mir gstalte. S Lebe das uns zum definitive Ziel bringt.
Was danach chunnt? Kei Ahnig. Absolut kei Ahnig. Himmel? Hölle? Nix? Neustart? Wechsel in e anderi Dimension? Kei Ahnig. Aber dr Sinn vom Lebe isch nit usezfinde was es Ziel isch. S Ziel vom Lebe isch dr Weg zum Ziel.
Hoff ich ha dr irgendwie e Antwort chönne geh. Freu mi uf dini Antwort!
Marc
Kommentare
Kommentar
Danke für die tolli Antwort.
Mengisch suecht mer wie z wiit und denn sind eigentlich die naheliegenste Sache d Lösig. Klar laht diini Antwort no mega viel Spielruum und beschribt eigentlich ned was mer jetzt jede einzelni Tag mit sim Lebe mache sell aber s isch en Afang. Danke dir!
Für mich selber hani de Sinn bis jetzt ned/nonig gfunde. Aber ich denke dass ich das au nie wird finde wil ich meh nach ere Lösig aso me Rezept gsuech han wasi mit mim Lebe mache sett. S git vermuetlich ned ein einzige Sinn warum mir da sind aber was sicher immer cool isch wie mit denke chönd und mengisch uf en neue gsprächspartner treffed und üs ustuusche chönd
übrigens tolle gedanke wege mer weiss ned als wie lang de „biblisch tag“ definiert isch. findi ebe au so und bi iiverstande dass wie beides stimmt
Kommentare
Kommentar
Glaube selber au, aber finde kei Antwort i de Bible oder susch. Und ja diini Antwort isch sicher en Aasatz, aber was isch denn guet und wie chamer helfe?
Ich glaube au anes Lebe nachem Tod, aber was selli mit mim irische mache? Bzw. wie chamer das „richtig“ lebe oder wieso setti das überhaupt lebe...?