Ich han en heftige Strit gha mit minere beste Fründin. Sie het sit öppe 1 Johr en Fründ, Ich verstoh mi leider überhaupt nöd guet mit ihm und darum hengt sie‘s nie mit üs zemme sondern immer trennt. Ich weiss das sie ihn scho etlichi mal betroge het und vor kurzem het si e Affäre mit em kolleg vo mir agfange.

Ich versuech mich so guet wies goht us ihrne Männergschichte usehalte aber ihre trotzdem Tipps geh. Meistens seg ich ihre nur dass sie sich selber entscheide muess, ob sie das mit dem Typ jetzt würkli will mache. Bi mir lästeret sie vill über ihren Fründ ab und will ich ihn sowiso nöd bsunders mag, stört mich das au nöd.

Vor kurzem hani denn vonere Kollegin us ihrem andere Fründeskreis (wo au ihren Fründ drin isch) erfahre, dass sie dött regelmässig über mich ablästeret. Sie verzellt, das ich de Beziehig zu ihrem Fründ im Weg stoh. Mir verzellt sie aber das ihren Fründ sie nervt und sie lieber en andere hett. Niemert ussert ich weiss, das sie ihren Fründ betrügt.

Als ich vo ihrere Lästerei erfahre han han ich si konfrontiert und mir hend en heftige Strit gha. Es het demit geendet das ich sie us em Zelt gschmisse han (isch während em Openair gsi). Ich chum mir völlig verarscht vor. Am liebste wür ich ihrem Fründ vo de Affäre verzelle. Ich wött gern glaube das es es Missverständnis isch will si jo würkli mini besti Fründin isch, aber si het scho immer Problem mit de Ehrlichkeit und Loyalität gha und es fallt mer liecht zglaube das sie au mir gegenüber nöd ehrlich gsi isch.

I wür gern drüber stoh und sie ihrne Problem selber überloh, aber i ha au es schlechts Gwüsse es ihrem Fründ witer z‘verschwiege, will er sich jo offesichtlich inere ähnliche Position wie ich befindet. Was würdet ihr mache?