Du seisch, ihr redet nüme in Liebi mitenander - betrifft das au die Situatione, wo du so Sache asprichsch? Will denn söttsch es velicht eifach loh bzw. uf en Momänt verschiebe wos dr besser glingt. Fang eifach drmit aa, dass du ihn mega gärn hesch und jede Momänt mit ihm gniessisch. Das hilft em velicht, dass är nid in Sälbsthass inerutscht. Grundsätzlich isch es aber nid dini Ufgob, ihm us dem usezhälfe. Är muess sälber lerne, sich sälber zliebe und zakzeptiere - und glichzitig au an sich zschaffe.

Nur will är Autismus het, heisst das nid, dass är nid lerne chan mit Situatione umzgo und sis Verhalte zkontrolliere. Velicht nid grad in ere akute Überforderigssituation, wo är ere Überreizig usglieferet isch unds nüme ushaltet, aber die rästlichi Ziit. Das dörfsch du erwarte - nid vo jetzt uf plötzlich, aber als Prozäss an dem är dra schafft. Autismus isch nid heilbar, aber mr chan lerne, drmit besser umzgo - als Betroffene und au als Bezugsperson. Versuech ihn in dem ine zunterstütze und velicht findsch du sälber in ere Sälbsthilfegruppe au no guete Rot.

Und du muesch di halt velicht in so Diskussione chli zruggnä bzw. sie umgo, so dass es für ihn nid zu ere Überforderig chunnt. Meistens isch es jo d Ufregig nid wärt. Du weisch jo, wo du rächt hesch oder dass es nid eso druf aa chunnt. Und du weisch, warum är velicht ame eifach en unghüre Tüpflischisser chan sii. Und warum är tatsächlich ame ufbrausend, kindisch und verletzend isch - was übrigens jede ame isch, das chasch em jo au säge - und dass är halt würklich ame e vor Ussesicht här verzerrti Wahrnähmig het.

Är fühlt sich bestimmt sehr oft de Situatione usglieferet und weiss nid, wie drmit umgo. Velicht chönned ihr zäme en Algorithmus entwickle, wie ihr so Gspräch führe wänd, so dass är en Ablauf het zum sich dra hebe und die wichtigste Fakte velicht grad scho ufm Blatt (z.B. dass du ihn liebsch). Das chönnt ihm hälfe, dass är nid zum Opfer oder us dem use zum Täter wird, sondern ihr chönned gmeinsam handligsfähig sii. Chönneds jo mol usprobiere. Im Idealfall mached ihr au ab, dass är zu so Gspräch nei säge chan. Velicht maximal 2x - damit är sich nid duurhaft druckt.

Das sidn so die Sache wo mr grad so in Sinn cho sind. Ich hoff, är goht in e Therapie, denn chönnted ihrs velicht dört au no aspräche.

Hallo lili,

Ich han dini Antwort zu dem Post hüte zum erste mol gseh (sorry ;() ich muess wirklich sage, du hilfsch mir jetzt zumindest enorm! Er goht erst sizmene halbe joohr id Therapie (isch sini Entscheidig gsii) und dett seit er au er macht Vortschritt.. wass aber isch, sit dere Zyt ischee wirklich fast nir no am game (au bode arbet) und er hed agfange mit sache wie "eehäng dinch selber" und "schlitz dini kehle uf" ah, die siite hani NONIE an ihm gseh ka. Er isch immer recht kultiviert und eihig gsi... Mittlerwiile wird er au chli Perfide in de gspröch wo mir hend. Sini absouluti liideschaft isch de Kampfsport (mir hend uns au derr kenneglernt) aber sitemene Joor hani agfange mitm Bouldere und mach gar kei Kampfsport meh. Er seit immer dasi so öbbis us sim lebe weggnoh han, und dass das fustierend und verletzend isch. Er seit au immer- du seisch mir demit, dass du 80% vo mir npme liebsch - und das duet weh... Sit fast emene joor hilf ich sini eigeni kampfschuel ufzbaue. Nur weli kei Kampfsport meh mach heissts nid, dasi ihn nümm lieb, und es isch mir klar dasses füre autist schwer isch, aber au ich bin ADHSler, ich wechsle mini interesse fast scho so oft wie mini unterwösch xD

Ich will mit dene sache wirklich eifach nir sage dasi soo überfordert bin, dasi nid weiss wie ich fühle söll. Ich weiss dumm gseid nie, wenn er wieder was gemeines seit (ich bin recht sensibel xD) oder mich weg de dümmste sache aschreit - wie wennk bim game was falsch mach.. und wenn sich anderi iimische- wird er sehr primitiv und redet echt sehr schlimm vo mine fründe...

Ich weiss eifach nümm wiiter..

(Alles wasi gschribe han isch sehr subjektiv, aber ich denk auvdas isch ab und zue wichtig :)

Liebi grüess amsell