Was würsch du mache?
Hallo zäme
Ich hoff öpper vo eu cha mir witerhelfe, oder eventuell paar gueti Tipps gäh.
Ich bi bald sit 3 Jahr inere Beziehig mit mim Fründ. Eusi Beziehig isch am ahfang so toll gsi mer hend eus super verstande hend au sehr viel zemme unternoh, hend eus immer alles offe und ehrlich verzellt etc.
Leider hani müesse erfahre, dass er mich betroge hed im Jahr 2018. Zerst hani t'Beziehig wele beende. Aber irgendwie hani glich wele um eusi Beziehig kämpfe. Au wenns mir schwer gfalle isch.
Er het mir dazumol gseit gha, dass er das mega bereut und das er das nie het welle.
Ich füehl mich hüt no dreckig weni dra denke. Aber ich lieb ihn unglaublich fest. Glich muessi ab und zue ah das denke.
Aber jedesmall weni ihn drufahspreche ob er glücklich isch mit mir, seit er immer Ja, ich chan mir es Lebe ohni dich ned vorstelle. Er het au vor eh Zuekunft z'ha mit mir. Zemezieh, Hürate etc.
Wtf? Was sölli drunter verstoh und den heissts mir Fraue sind kompliziert.
En Teil vo mir isch glücklich mit ihm und en andere Teil ned.
Weiss echt ned wasi söll mache?
Antworten
Antwort
Hei Rebel,
Für micht tönts chli als wärsch du dir unsicher und suechsch eh bestätigung be dim Fründ... du musch jo ned ihn froge eb er no glücklich isch .. vell meh musch du dich sälber froge bin ich glücklich? Das isch immer sWichtigste!
Es isch absolut verständlich das dich de Fehler - wenn mers so nänne will - verletzt het. Du musch dir au mol Gedanke mache eb dis gschwächte Vertraue ihm gegenüber sich wieder verbessere chan. Liebi isch eis vo de schönschte Gfühl wos git und nüt bringt mänsch nöcher zu ehnander hee als wenn mer die gliche Gfühl für ehnander teilt. Ich glaube eifach au das es ned sRichtige isch wenn mer met zweifel hürotet, wei dus erwähnt hesch.
Mach dir Gedanke zu dinere Position ih euchere Beziehig und stell für dich fest was DU willsch..
Liebi grüess, ich hoffe du findsch für dich die richtig lösig ;)
PS: mer het ame eh Pro-Contra-Liste ghulfe