Heii

Du chasch es ihm einersits säge, anderersits chasch es ihm au zeige. Säg em, dass du gärn für ihn da bisch, är sich bi dir mälde darf wenns ihm mies goht, du ihm gärn tuesch zuelose und au bereit bisch, mit ihm Schritt zgo wie zum Bispiel Kontakt ufnä mit dr Jugendberatig oder eme Therapeut. Zeig eifach Interässe an dem wo ihn beschäftigt. Säg em, dass du ihn verstahsch und ihm gärn wettsch hälfe. Du dörfsch au immer säge, was es mir dir sälber macht, also was du drbi fühlsch wenn är dir z.B. öpis schlimms verzellt. Usserdäm chasch en ilade zu Unternähmige mit dir und andere, du chasch em z.B. au mal e Trostschoggi schänke, es ermuetigens Chärtli schicke oder au eifach mol en Spruch uf WhatsApp. Uf zwei Sache söttsch eifach achte: Erstens lueg, dass du guet uf dich sälber luegsch. Versprich und mach nüt, wo dir eigentlich zvill isch, versuech klari Gränze zzieh. Zum Bispiel dass du nur bis Zobe am 9i mit ihm bereit bisch ztelefoniere, wenn du sunst sälber nüme chasch ischlofe, wills dich belastet. Und zweitens, stell klar dass du das uf rein fründschaftlicher Basis machsch und dass es nüt zbedüte het, dass du das für jede würdsch mache wod gärn hesch. Ämel wenn du nid in hn verliebt bisch. Das isch wichtig, damit är sich nid falschi Hoffnige macht, när enttüscht isch unds em no schlächter goht. Wenn du dich überforderet fühlsch, chasch guet au mol em 147 alüte - dört chönne sie dr gueti Tipps gä. Die Nummere chasch au ihm gä, dass är öper het, dem är au mitts ir Nacht chan alüte im Notfall.

LG