Hallo

aso ich persönlich lere lüt lieber dieäkt kenne als übers schribe.

Drum würd ich mich ned zfeschd ufs schribe fixiere sondern mee ufd Komunikation mid em Gägeüber.

Eifach mal öbber aspräche und sich traue. Vl gads id Hose und sie/er isch der ned sympatisch oder umgekerr aber früener oder spöter klappts de scho.

Es isch ja au wichdig dass es öbber isch wo dich so gärn hed wied bisch und ned dass dich musch verstelle.

so gfindedmer scho de Richdig Partner/Kolleg,...

isch mini Meinig🤷🏽‍♀️😅

Fang ah kiffe so finsch sicher eh gueti

Heei mach der ke sorge weu no ke beziehig hesch ka, ih ha viu kollege/kolleginne bi dene loufts glich. Mach der sicher ke stress, weu ig bi der meinig, dass denn we unbedingt eh fründin wosch, de klappts sowieso nid. Erstens merke si meistens dass du "verzwiflet" bisch u zwöitens isch d gfahr gross dass di versteusch drmit eini findsch. Blib genau so wie de bisch, we di versteusch bricht eh beziehig sowieso einisch usenand.

We schribsch de schrib genau so wie du ou im reale läbe würdsch antworte. u we di froue versetze de weisch emu dass so eini ganz bestimmt nid dr charakter het wo du suechsch.

Ig wünsche der ganz viu Glück und mach der nid z viu Gedanke! 🍀

Hei du..

Glaubsch du säuber überhaupt dra, ds dir ä Beziehig zuesteit und ds du gnueg wärt bisch für ds öpper mit dir ä Beziehig wot ha!? Sorry wenis grad so diräkt säge, aber weni lise was und wie du schriebsch dünkts mi bisch du dür diner Enttüschige scho dert aglangt, dass du säuber eig nid meh gross dra glaubsch und viellich erhoffsch dir izze das mir dir wieder Hoffnig chöi mache. Und i wett dir erlechgseit au säge, da isch sicher sehr vieu machbar, das au du ä guet funktionnierendi Beziehig chasch ha!!!

Bis säubstüberzügter vo dir! Wüu warum sött öpper vo dir überzügt si wenn dus säuber nid bisch? überleg dir mau 50 Gründ warum me mit dir ä Beziehig söt starte und ha. Schriebs dir würk mau uf! Häb di unbedingt säuber sooo fest gärn u bis überzügt vo dir u dine Qualitäte!!!

und denn überleg dir, wie de dini Beziehig när sötti usgseh. Steus dir würk vor, was wetsch das dir när machet, wie sött die Person sie, mit welne Theme sött sich dini Usgwählti beschäftige, was sött ihre wichtig si, wie sött si zu was stah?

Denn zum Schriebe... Kommunikation isch scho mündlich nid eifach, de wirds schriftlich, wo sogar no Tonlag und Gsichtsusdrück, Mimike und Gesticke fähle nid eifacher. Es wird so vieles missverstande u me weiss vieu eifach nid so wi öppis gmeint isch, grad au vorauem, weme ä Person no nid kennt.

Du schinsch ä rächt offnegi Person z si wo mit däm weniger Problem het u nid so vorschnäu säch Meinige über öpper übers schriebe macht. Aber angeri mache ds haut scho u si skeptischer.

Bisch vieu am Handy und PC? oder geisch au öppe use u machsch öppis aktivs? wüu ds isch zb au öppis wo sehr vieli lüt ir Beziehig wei, dasme au öppis zäme ungernimmt u öppis aktiv macht...

Wie wärs mit würk mau lüt süsch aspräche u kennelere? Gang use u lern lüt kenne. Sisch nid eifach, aber wie bi auem im Läbe gilt au hie: üebig macht dr meister. u chasch au mau lüt aspräche, wode viellich nid vo afang ah 100%ig überzügt bisch.. aber sehr vieli lüt si angers aus si zerst würke... u oftmals chasch die när au eifacher aspräche.

überleg dir wo chönntsch lüt träffe? A Geburifest und Partys vo Kollege isches au immer rächt eifacher mit Lüt is Gspärch z cho, dört sisi oftmals au lockerer wense asprichsch, aus wenn se eifach im Usgang oder so asprichsch...

I hoffe i bi dir da nid z nach träte, i däm i di chli ha probiert z analysiere u sache use z läse. Ha dir rein und erlich wöue häufe! :D

Häbs guet!